سندريلا!!

إسمي سندريلا، عندي حاجة وعشرين سنة، مش كبيرة ولا حاجة، لكن برضه مش صغيرة، خدت من الدنيا اقلام الصلا عالنبي خلتني كتيبة محترمة، من مواليد حارة مشتهر القاهرة، بشتغل وكله تمام، بحب ربنا وعمر ماكان بيني وبين أي حد عداوة، حتي الرجالة حبايبي وعشرة قديمة، وبرغم العشرة ماعرفتش افهم، ولا حتي اتربي بعد كل الخوازييق المرشقة ف كل حكاية بدأت وخلصت وانا برضه مدهوله!!

علي فكرة ماتفهموش غلط!! حنا بنتين جامدين وكلاس بحق ربنا، متعازين يعني ولامؤاخذة، بس المشكلة بقة اننا سذاجة مفيش قبل كدة، بنفتكر ان كل واحد بيحكي عن نفسه بيقول كلام حقيقي مش فشر!
وبصراحة بقة العاطفة عندي "جياشة" بشكل يحرق الدم، واكمني مبقلش غير الصراحة فبظن الخير فكل دكر يخبط علي شكمجية قلبي، مبفهمش بقة انه حرامي ابن كلب إلا لما الاقي روحي ناقصة فص!

البلوج ده بقي مجرد محاولة للفهم، هو فعلا مافيش رسالة- أقصد رجالة! وصحيح لازم نكيف نفسنا علي كدة، ولا فيه بس عاملين بيات شتوي!! واللا كل اللي بيتنططوا دول رجالة بس انا اللي بستعبط وعايشة علي نفسي!!

أنا هحكيلكو واسترسل، وانتو أكيد هتدوسو معايا أنا وسندريلا يمكن بجد تساعدونا!!

بصراحة من كتر الرمي، والحلق والتنفيض اللي بقينا نمارسو بعنف علي خلق الله مش عارفين إذا كنا ديلوديد، واللا طلعنا تمام وبنعمل شغل ريسايكلينج بما يرضي الله واليونايتد نيشنز!!